Askofu adaiwa kudanganya uraia wake

Wenyeji wa Mkoa wa Mbeya wanaoishi jijini Dar es Salaam wamewasilisha barua na vielelezo katika ofisi ya Mamlaka ya Taifa ya Utambuzi (Nida) kupinga Askofu Mkuu wa Kanisa la House of Prayer  Shield of Faith Christian Fellowship, Mulilege Mkombo, anayedaiwa kujiandikisha kama mzaliwa wa Tanzania kwa lengo la kupata kitambulisho cha Taifa.

Katika barua hiyo ambayo imepelekwa kwa Mkurugenzi Mkuu wa Nida, Dickison Maimu, na nakala kwa Mwenyekiti wa Kamati ya Bunge ya Ulinzi na Usalama, Edward Lowassa, wameeleza kuwa Askofu Mkombo jina lake halisi ni Mukombo Muyodi aliyezaliwa Aprili 4, mwaka 1964 eneo la Butumba Kimakondolo Lumbumbashi, Jamhuri ya Kidemokrasia ya Kongo (DRC).

Imeeleza kuwa askofu huyo katika mchakato wa kupata kitambulisho cha uraia kwa jina la Mulilege Mkombo, amejiandikisha katika Kata ya Boko Magengeni jijini Dar es Salaam kama raia wa Tanzania.

Maimu akizungumza na NIPASHE mwishoni mwa wiki alithibitisha kupokea barua na vielelezo kutoka kwa wananchi hao vya pingamizi dhidi ya askofu huyo na kwamba mamlaka yake kwa kushirikiana na Idara ya Uhamiaji vimeanza uchunguzi wa suala hilo.

Kwa mujibu wa barua hiyo iliyoandikwa na kusainiwa na Mkurugenzi Mtendaji wa taasisi inayoshughulikia uhifadhi wa mazingira na Idara ya Haki za Binadamu (MRECA), William Mwamalanga, ambayo NIPASHE imefanikiwa kuona nakala yake, imeeleza kuwa askofu huyo siyo mzaliwa wa Tanzania bali amezaiwa DRC.

“Timu yetu ya watafiti imefanya kazi na kubaini pasipo shaka kuwa mtajwa hapo juu ni raia wa DRC hasa baada ya kumuhoji mkewe aitwaye Mary Mukombo ambaye walifunga ndoa yao huko huko DRC na wazazi wao walihusika kufunga ndoa hiyo na kutambuliwa na mamlaka ya DRC,” inaeleza  barua hiyo.

Barua hiyo imezidi kueleza kuwa watafiti wa MRECA wamebaini vyeti vya taaluma na viapo vya kisheria kutoka mamlaka ya DRC na kwamba Askofu Mukombo Muyodi alifanikiwa kughushi vyeti vya kuzaliwa baada ya kununua wazazi mkoani Mbeya na kujiita Mulilege Mukombo Kameka jina ambalo ni maarufu kwa kabila la Wanyakyusa mkoani humo.

“Ikumbukwe ni vigumu kujua nia ya Mukombo Muyodi kununua wazazi na kujipachika jina la Mulilege Mkombo na kumfukuza mkewe huku akitajwa kuwa alikuwa askari wa zamani wa DRC,” imeeleza sehemu ya barua hiyo.

Aidha, taasisi hiyo ya MRECA imewasilisha Nida vyeti vya kuzaliwa vya askofu huyo akiwa DRC, vyeti vinavyodaiwa vya kughushi na pasipoti ya kusafiria hapa nchini.

Mara kadhaa NIPASHE ilimtafuta askofu huyo bila mafanikio, lakini mkewe, Greener Pulin, alizungumza kwa niaba ya mumewe akizungumza na kusema kuwa watu wanaohoji uraia wa askofu baadhi ni waumini wa kanisa hilo ambao wanatumiwa na baadhi ya watu kwa lengo la kumdhoofisa katika utendaji wake wa kazi.